| |
So, nuu isses ball soweit. Middn heutige Diesdich hömmer noch genau drei Dooch, bis die Welt onnder gädd. S iss owwer aach Zeit, dässes jetzt endlich wie proffezeit n 21. Dezember vorbei iss midd a Welt, in deersch jo wallich nixmerr schöö iss, zu laawe. Gugg dir doch amoll nerr bloß mei Tagebuch vo die vergangene vier Woche oo. 25. November: die erschte Lichterkette senn oogschlosse unn leuchte! Woss mir auffällt: Der Stromverbrauch für die Weihnachtsbeleuchtung vo die Häuser unn Gärrde scheint direkt proportional zu die Hektik, Blödheit unn Unzufriedenheit vo die Leut zu senn. Üüwersetzt: je verröggter die Zeite, desto mehr kitschig Weihnochtsbeleuchtung aufghängt. Unn doss in Zeite, woos middn Strom sowieso langsam knapp würrd! 6. Dezember: Ich woor widder als Niggelaus unterwaachs, frääch ees vo die besüchte Kinner, woos sichs zu Weihnochde voss Christkind wünscht, unn griech zur Antwurrt: „Lieber Nikolaus, ich hab schon alles, mir fällt nichts ein.“ Schlimm, odder? Odder gut unn mir hömm’s endlich gschafft, s erscht Kind wunschlos glücklich zu mache? 9. Dezember: Ich hör Radio unn trau mei Ohrn nedd: „Der Deutsche Wetterdienst hat für den Landkreis Rhön-Grabfeld eine Unwetterwarnung herausgegeben. Dort können 15 – 20 cm Neuschnee fallen.“ Deifel, docht ich, jetzt künnt der Weltuntergang doch 12 Dooch zu ball! Odder doch nedd? Gleich zu die nächst Tankstell gfohrn, 30 Liter Wasser, a worrme Degg unn 50 BiFi gekäfft, ömm bis 21. Dezember zu üüwerlaawe. Und dann hodds wallich gschneit! 10 cm, unn doss n 9. Dezember! Ich verstääh bis heut nedd, wie mir doss süsst, wie‘s noch keen Verkehrsfunk odder Unwetterwarnunge gaawe hodd, üüwerlabbt hömm! 13. Dezember: Werbung ins Fernsehen! Ich hör, däss jetzt alkoholfreis Radler gidd! Radler – alkoholfrei! Doss wär genau so, wenn a Metzger bis jetzt fettarme Broodwürsch oogeboode hodd unn dann seecht, däss jetzt aach Broodwürscht ohne Wurscht gidd! 16. Dezember: Programmhinweis ins Fernsehen. Brutale Szenen mit Mord- unn Totschlooch, Blut, Messer, eener würrd hinnerrüggs middn Hommer derschlooche. Und dann a ganz sanfte Frauenstimm, die seecht: „Spannende Feiertage mit Ihren Krimiserien im Ersten.“ Ja, ja. Das Fest der Liebe kann kommen. Odder aach nedd, weil jo schließlich drei Dooch vuurhar die Welt onnder gädd. Zeit würrds. Servus, der Eustach. |
