| |
N kommede Duurschdich odder amend scho murrn oowerts isses widder soweit: der Niggelaus künnt! Ich mach doss midd mein Kuseng, n Hannes, jetzt scho üüwer 30 Johr, unn muss sooch: eene vo die schwerste Rolle unn Auftritte ins ganz Johr! A richtiche Herausforderung, die unheimlich viel Spontanidääd unn vor allem Einfühlungsvermööche verlangt. Ich wells kurz beschreib. Du künnst mit Bischofskostüm, Boort unn Mitra noo die Haustür, klingelst unn bist scho froh, wenn die Mutter unn kees vo die Kinner aufmecht. Bist jo noch nedd so weit. Erscht grichste dein Zettel mit die berühmt-berüchdichd Einteilung „gut/schlecht“. Meistens zu klee odder schwer leserlich gschriewe. Du schwetzt wie die Sau, künnst vo die Kält nei die Hitz inns Wohnzimmer unn die Brill mit Fenstergloos lefft oo. Und jetzt sösst du als sprichwörtliche Autorität der Kinner die Levite laas. Bist total unvorbereit, weil du den Zettel vuurher nedd amoll durchgelaas kannst und somit goornedd wässt, woos alles künnt! Sösst doo dabei owwer sicher und bestimmt wirk unn jo keen Fahler mach. Die wichtichste Reechel für junge Niggeläus: 1. Wenn du nei künnst und a Kind flennt, nahms nedd gleich droo. 2. Wenn doss Kind droo iss, unn ömmer noch löötscht, fang erscht midd die gute Dinge oo, hol’s zurück, läss a weng komm unn fang dann s Kritisiern oo. 3. Wenn du a Kind n Vuurdroch hältst unn die Lippe voss Kind fange s Zittern oo, dauerts noch drei Sekunde, no flennts. Owwer alles leichter gsocht wie gedönn. Do brauchst du Jahre! Von weechen, du sösst als Niggelaus keen Fahler mach. Unmööchlich! S vergange Johr musst ich bei a Meedla in die Kategorie „gut“ wörtlich vuurlaas: „Oh, kleine Schandalle, du kannst ja jetzt auch schon alleine tauchen – und das ohne Schwimmflügelchen!“ Senn jo allee die Vuurnoome heutzudooch scho a Herausforderung! Schandalle, Tschennifer, Schaggeline! Egal. Kaum vuurgelasst, hobb ich scho gemerkt, woss ich jetzt fürrn Schmarrn gsocht hadd. Tauchen ohne Schwimmflüüchelich! Doss hobb ich als schwimmtechnischer Blindgänger früher ömmer automatisch gemocht – ob ich wollt odder nedd: ohne Schwimmflüüchelich kannt ich getauch! Unn aus derre Nummer künnst du dann nixmerr raus. Stässd ins Wohnzimmer, wässt genau, woss die ältere Kinner denka, unn siehst, dässde weiter künnst. A schwerre Roll, so a Niggelaus. Servus, der Eustach. |
