| |
Jetzt bleibt eersch also. Der Barack Obama iss zum zweddemoll zum amerikanische Präsident gewählt wurrn unn konn soo sei ocht Johr als mächtichster Moo vo die Welt vool gemach. Ob die mächtichst Fraa vo die Welt, unner meistens dreiknöpfig Angela, off mehr wie ocht Johr künnt, würrd merr dann jo s nächst Johr sänn. Zweifellos isses so, däss a Präsidentewohl in die USA a wichtichs Ereignis iss. Woss sich doo dabei owwer unner öffentlich-rechtliche Fernsehanstalte ARD unn ZDF leiste, iss scho der Hammer. Alle zwee senn doochelang in Washington vor Ort unn die Tagesthemen unn s Heute-Journal komme live aus die amerikanisch Hauptstodt. Doss fällt mir ömmer widder auf: langets denn nedd, wenn entweder s Erscht odder s Zwett durch die Geechend flieg dääd unn sich obwechsel dääde? Egal woos iss: alle zwee müsse se ihr Noose direkt vor Ort vurrn droo hobb. Wenn zum Beispiel nerr bloß die Gruppenauslosung vo a Fußball-Weltmeisterschoft iss, senn alle zwee midd Reporter, Kameramänner, Tontechniker usw. live dabei. Die müsse alle hiefliech, ess, trink, schloff unn wäss der Deifel woos noch alles. Unn alles vo unner Rundfunkgebühre! Odder Rundfunkbeidrooch, wies ab 1. Januar 2013 jo häss söll. Ab dann Termin isses wurscht, wieviel Radio in a Haus römm stänn, pro Wohnung würrd bezohlt, ganz egal, ob du üüwerhaupt n Radio hosst odder nedd. Muss merr sich amoll vüürstell! Du hossd goor keen keen Radio odder Fernseh, musst owwer trotzdem bezohl, weil doss gerechter iss wie jetzt! Bis jetzt musst du jo aach bezohl, wenn du zwor n Radio hossd, owwer nie höörscht. Bloß wenn der Radio noch fabrikneu unn original verpackt iss, musst du die Rundfunkgebühr nedd bezohl. Allee also die Möchlichkeit, däss du höörscht und den Apparat dezu hossd, langt scho, dässda die Gebühr bezohl musst. So wie der Schnapsbrönner, der rückwirkend für zehn Johr Steuer bezohl sollt, obwohl er goor keeen Schnaps gebrönnt hodd. „Aber den Apparat dazu haben Sie!“ hodds Finanzamt argumentiert. Ich wenn der Schnapsbrönner gewasst wär, wär a poor Dooch später offs Amt und hädd für zehn Johr rückwirkend Kinnergeld für fönnef Kinner verlangt. „Aber Sie haben doch gar keine Kinder!“ wäär garantiert die Antwurrd gewasst. „Wääs ich“, hädd ich frech zur Antwurrd gaawe, „owwer den Apparat dezu hobb ich!!!“ Servus, der Eustach. |
