| |
Wenn merr nur amoll zwee Beispiele aus die jünger Vergangenheit betrocht, fräächt merr sich, wie Mensche, in den Fall Männer, gleichen Alters so unterschiedlich leistungsfähig gsei könne. Do laas ich in die Zeitung, däss der Christian Ude, Noch-Bürchermässder vo München unn jetzt Spitzenkandidat vo die SPD für die Landdoochswohl in Bayern, 65 Johr alt wurrn iss. Doss berühmt Alter also, wo Generatione vo Männer drauf hie fiebern, ömms endlich zu erreiche, unn dann midd‘s Schaffe aufzuhörrn. Annererseits muss merr feststell, däss heut mit 60 jo fast sowieso scho keener merr schafft und‘s bei vill goornedd annersch gädd, weil se im wahrsten Sinn des Wortes „fertig“ senn. Tünchner zum Beispiel, odder annere, die schwer körperlich gschafft hömm. Von weechen, bis 65 odder goor 67 schaff! Unmöchlich! Do mecht der Körper eefoch nedd midd! Unn dieser Christian Ude, den sei enzich körperlich Oostrengung in sei Berufslaawe wohrscheinlich iss, jedes Johr bein Bieranstich offs Oktoberfest n Schleechel hoch zu hebe, ömm no midd zwee lommbiche Schleech oozuzapfe, der bewirbt sich jetzt mit 65 für s Amt von Bayerische Ministerpräsident. Bürchermässder döffed er aus Altersgründ scho gornix merr wäär, für n Ministerpräsident sölls owwer scho noch fönnef Johr lang. Muss offs Oktoberfest joo aach nedd oostech! Unn a gewisser Peer Steinbrück, seit Januar aach scho 65, schaffts, neewa sei Abgeordnetentätigkeit im Bundestag in drei Johr sage unn schreibe 89 bezohlte Reden zu halte, dofür insgsamt 1,25 Mio. Euro zu kassiern, 237 unbezohlte Vorträäch zu leiste, unn zwee Bücher zu schreibe! Die eene sprudeln also nur so vor Energie, die annere senn mit ihr Kräft am End unn sehne die Rente bei. Wie mei Freund Gotthold zum Beispiel. „Wenn ich nixmerr schaff muss, setz ich mich erscht amoll a ganz Johr lang nei n Schaukelstuhl!“ hodd er gsocht. „Unn nochert?“ hobb ich neugierig gfräächt. „Nochert fang ich ganz langsam s Schaukeln oo!!!“ Passend dazu noch a schönner Witz, den ich die boor Dooch ghört hobb. Gädd a Moo zunn Doggder unn frächt, wie er 100 Johr alt wäär konn. „Rauchen Sie?“ hodd der Doggder gfräächt. Der Moo: „Naa“ „Trinken Sie?“ Moo: „Naa“ „Gehen Sie spät ins Bett?“ Moo: „Naa“. „Haben Sie Frauengeschichten?“ Der Moo: „Naa!“ Dodrauf der Oorzt: „Guter Mann, weshalb wollen Sie dann überhaupt 100 Jahre alt werden?“ Servus, der Eustach. |
