| |
Gut a Woche iss er jetzt scho widder her, der mittlerweil scho legendär „Rhöner Wurstmarkt“ in Ostheim. Viel werrn jetzt denke: „Ömm Gott’s Wille! Jetzt fängt der Eustach aa noch domit oo. Jetzt worrn merr froh, däss endlich vorbei wor!“ Ja, stimmt scho. Der Werbeaufwand unn die Berichterstattung. Viel mehr gädd ächendlich goor nedd. Muss für n Vegetarier scho horrt sei, die Zeit vier Woche vuur, unn zwee Dooch noch dann Morrd. Vier Woche vurher lefft die Maschinerie so richtich oo. Vorberichte, Interviews, Sonderseiten, brominennde Wurschtpaten, die in die Zeitung ihr Lieblingswurscht vurstelle, und und und. Unn fast noch schlimmer: die zwee Dooch noch den Morrt. Widder Bilderserien, Fress(e) - Entschuldigung - Pressekonferenz, wie’s gelaffe iss, Anekdoten am Rande, „Wurstmarktsplitter!“. Vuurschlag für 2014: a Livedigger! Muss heutzudooch eefoch sei! Volle Bulle! Wenn bei uns in die Geechend scho amoll so richtig woss loos iss, no gilts halt! Iss owwer aach kee Wunner, däss der Rhöner Wurstmarkt so ein Erfolch iss. A Morrd für die Leut bei uns, wie gemoold. A gfonnes Fresse! A Traum! Merr konn zum Gugge hie, prowier unn versüch, biss merr platzt, keener schmarrt een blöd oo, däss merr aach awoss käff söll. Du gässt hemm, bisst sood, hossd keen Cent gebraucht unn schwärmst: „So muss a Sonndich sei!“ Ja, die orme Vegetarier. Brauche doo erscht goornedd hie. Doss senn die, die n Freidich a Schweinshaxe neiwürche – weil Fasttag iss! Annererseits könne die Vegetarier heuer gejubel. S gidd grösse Kartoffel! Die Leut gugge sich scho nooch Holzspalter ömm! Unn ich seh scho den eiskalte Konter vo die Pflanzeesser: „Rhöner Blättermarkt“ in Dürrnhof. Ganz noochs Motto vo dann alte Vegetarier-Witz, wo die Mutter ruft: „Kinner, gädd rei, s Esse würrd dürr!“ Ower Schluß jetzt mit die Lästerei. Kompliment oo alle, die in Ostheim dabei worrn. Subbersach! Und noch a Tatsachebericht vo Ostheim bein Wurschtmorrd. A Gast vo Hessen (worrn jo wallich vill zum Fechte üüwer die Schwedenschanze komme) oo n Stand mit Pferdesalami. „Herr Metzger! Schauen Sie einmal her, da ist ein Stück Gummi in Ihrer Wurst!“ Dodrauf der Rhöner Gäulsmetzger: „Ja, mein Herr! Doo sänn Sie amoll, in woffer Ausmaß heutzudooch der Gaul scho voss Auto verdrängt wurrn iss!“ Wurstmarktsplitter! Servus, der Eustach. |
