| |
So, seit vergangene Sonndich isses also widder Gschichte: s Oktoberfest in München. Allee scho die naggerte Zohle lässe staun: 7 Millione Leut, mehr wie 500.000 Hähnlich unn deutlich üwer 100 Ochse verspeist, voss Bier ganz zu schweiche. Die Größenordnung! Vo die 42 Hektar gröss Theresienwiese werrn fürs Oktoberfest 31 Hektar, also 310.000 qm genützt. Unn off derre Fläche drängeln sich Dooch für Dooch üüwer 500.000 Leut gleichzeitig. Do hodd jeder genau 0,62 qm Platz. A Bauer wenn sei Sau so wenig Platz gidd, würrd weeche Tierquälerei oogezächt! Merr muss amoll üüwerleech: Die Einwohner vo a mittelgrösse Großstadt dabbe gleichzeitig off ee enziche Wiese römm! Süch bei uns in die Geeched allee scho amoll so a grösse Wiese! Und: 7.500.000 Mooß senn verkäfft wurrn. Doss senn 6.000.000 Liter Bier! Ohne Witz: seit Jahren würrd jo drüü gstritte, ob die Mösser nuu gut odder schlacht eigschenkt senn. Dozu muss merr wöss: wenn a Wirt offs Oktoberfest nerr bloß 0,1 l Bier weenicher nei a Mooß dudd, wie wenn er vool schenk dääd, verdient er in die 14 Dooch insgsamt 450.000,-- € mehr! Unn die Preise! Do zanke die Leut drüü, däss a Liter Benzin mittlerweil 1,70 € ghosst, wobei doo 93 Cent (55%!) Steuern enthalte senn. Und stell dir vuur, wie kompliziert‘s iss, Benzin herzustelle. S Rohöl muss gekäfft weer, nei die Raffinerie musses, gereinigt musses wäär, ausliefer muss merrsch und und und. Und Bier? A bessle Wasser, Hopfen unn Malz besurcht, zommgekocht unn aweng läss ruh: fertig! 19 statt 55% Steuern droff unn dann offs Oktoberfest für 9,50 € pro Liter verkäfft. Fast sechsmoll so teuer wie’s Benzin! Unn gsoffe würrds in rauen Mengen! Und vor allem: eenerseits söll zukünftig nooch 22 Uhr kee Alkohol mehr in Tankstelle verkäfft weer döff, unn peinlichst passt die Seggiuridi ins Oktoberfest auf, däss ins Zelt fei joo keener raucht. Annererseits saufe die Leut in die Zelter die Mösser off Ex leer, tausende Bierleichen wärrn vo die Sanitäter obtransportiert und keener mecht sich dodrüü Gedange. „Auf eine schöne friedliche Wiesn!“ hodd der Ude beis Oozapfe getrunke. „Organisierts Massenbesäufnis“ könnt mehr aach gsooch. Schöö sölls widder gewasst sei. Wer doss gsocht hodd? Eener vo die Festwirt, der seit Sonndich ömm eine Million € reicher iss. „Ookassiert iis!!!“ Servus, der Eustach. |
