| |
Wie mir‘s der Gotthold verzehlt hodd, konnt ich’s nedd geglääb, owwer es iss scheinboor wallich so: in Roth in der Rhön, midds berühmt Rhön-Park-Hotel in die Näh, iss schon seit vier Johr kee ennzichs Kind merr geburrn wurrn! Die Kinner senn owwer aach nedd ins Krankehaus geburrn wurrn. Nix! In Roth gidds wallich scho seit vier Johr keen Nochwuchs merr! Dässes ömm unner Bevölkerungsentwicklung schlecht bestellt iss, hömm mir jo alle gewösst, owwer dässes so schlimm iss??? Seit vier Johr kee Nochwuchs! Woss doss für Auswirkunge hodd! Der Pforr hodd komplett vergessa, wie a Däff üüwerhaupt obblefft, s heilich Chrisam iss in sei Töpfle dodaal ausgedroggelt, unn wenn merr in die Kirch n Deggel von Kessel midds Taufwasser aufmecht, fühlt merr sich oo n ausgedroggelte Salzsee in Amerika derinnert: nur a neigebachelte, weiße Salzkruste guggt een oo. Vier Johr kee Nochwuchs! Vier Johr lang künnt kee Kind vo Roth nei‘n Kinnergorrda, nedd nei die Schul unn vier Johr gidds keen Weiße Sonndich! Vier Johr hömm die Ministrante unn Dreikönig keen Nochwuchs unn die alte müsse weitermach, bis sie scho nei die Disco gänn! Vo Fußballer, Musikante unn Feuerwehrler ganz zu schweiche. Und stell dir vüür, s würrd no wallich widder amoll a Kind in Roth geburrn! Die Eltern werrn midds Kind vo die Musikkapell oos Ortsschild obgholt unn direkt zunn Bürchermessder gschbielt, ömm sich doo ins Goldene Buch eizudrooche. Owwer genuch gelästert. Jetzt gidds Hoffnung für Roth! Merr ärchert sich dürrt verreggt, däss s Kloster Kreuzberg seit knapp zwee Woche mehr Gebuurte zu verzeichne hodd, als merr sellwer! A Klössder mit höherer Geburtenrate! Schlimmer konn merr jo goornixmer gsink, odder? Gut, offn Kreuzberg worrns klenna Bernhardiner, die off die Welt komme senn. Wurscht egal! Merr sidd, zu woos die Natur fähig iss. Seit Jahren, woss sooch ich, seit Jahrzehnten kee Nochwuchs merr in’s Klössder offn Kreuzberg. Unn dann würft die Bernhardiner-Dame Rana fünf Stück off een Schlooch! Well soch: s gädd monnichmoll lang nix, so wie in Roth mit die Kinner. Owwer wenns dann amoll los geht und’s klappt, dann rappelts! Fönnef off een Schlooch! Doss hädd ich jetzt vielleicht goornedd söll schreib, hä? Wer wääs, wie viel vo die weeniche junge Leut ich in Roth domit jetzt obbgschreggt hobb ............... Servus, der Eustach.
|
