| |
Woss sich derzeit jeden Duurschtichoowerds of'n Neuschter Morrdblatz obbschbield, is unbeschreiblich. A Veranstaltung eleggdrisierd die Massen, die nei die Neuscht strööma wie die Dolla: Duurschdichskonzerrde! Owwer woos iss s Geheimnis vo doss Phänomään?! S iss doch ächenndlich nix Außergewöhnlichs gebooda! Diisch unn Bänk im Freie aufg'stellt, a Mussig läss spiel, a woss zu Essa und a woss zu Dringa oogebooda. Ferrdich!
Owwer so eefoch konn's doch net g'sei! Jeder Hoosakühlesverein, wo of n Duurschtich a Fest machet und sich mit Barkblätz direkt vuur a subber eigericht's Zelt, n Spitzen-Kloowoocha, Fischbröödlich, Kaffeebar mit sellwer gebaggene Kucha, Saufbar und so weiter so richtig neihäng dääd, müsset mit a boor Hunnert Leut zufrieda sei. Und of n Morrdblatz komma bei eewich weit entfernt liechende Barkblätz und Aborte, kee Dooch üüwern Kopf, kee Fischbröödlich, kee Kaffeebar und kee Saufbar jeden Duurschdich a boor Dausend!
Mit'n altehrwürrdicha Kreuzberg isses net viel annersch! Die Barkblätz weit furrt (so weit, däss vill Leut scho mit Fohrrod nauf forrn!), kee Bedienung – owwer die Leut strööma! Doss konn mer doch nedd so richtig mitananner vergleich.
Woos isses nochert? Vielleicht die Kurgäst, die „Morrdblatz“ hörr'n und denga, däss do a Hinrichtung, also braggdisch a legalisierder Morrd, live zu senn is? Schmarrn! Ich denk, s Erfolgsgeheimnis vo die Duurschdichskonzerrde iss eefocher wie mer denkt: Mundbrobbaganda! Du musst eefoch dürrt sei, wenn da „In“sei wisst. Ganz nooch's Moddo: „Sehen und gesehen werden.“ Irchendwie konnsta dos alles fast scho mit's Münchner Oktoberfest vergleich! Gornet vuurstellboor, wenn Ami, Australier, Jabbaner und Iddalieener aa noch middkriega, wos do bei uns n Sommer jeden Duurschdich ab gedd.
Neuscht of Augenhöh' mit Neuschwanstein, Heidelberg, s Hofbräuhaus und Rothenburg ob der Tauber!
Owwer wo sölla die sich denn alle hiesetz, wenn sa komma? Wos der Gotthold, der Saggramoch, scho widder wääs, iss, däss der Bauausschuss vo die Stodt n Geheimbloon hodd: links und rechts vo'n Morrdblatz söll längsseitich jeweils a ganze Häuserzeil obgeressa wär, däss es mehr Platz gitt. Ich hobs geoohnt, wo doss mit dann Auflauf amol hie führt. Die Geister, die ich rief? Servus, der Eustach.
|
