| |
Hobbt ihrsch n vergangene Samsdich widder ins Fernsehn gsänn? „Ozapft is!“ odder wie mir sooche „Oogschdoche iss!“ Do hogge se in München jetzt widder zwee Woche lang in die Bierzelte dinn unn schütte sich s teuer Bier ins Hääd nei. Fast jeden Oowerts konnsde live ins Fernsehen bei doss Massenbesäufnis dabei gsei. Ich wääs jo nedd! Wenn du dir doss Oozapfe vo dann zukünftiche bayerische Ministerpräsidente Ude so ooguggst (ich bin amol gspannt wie er ab 2013 bei die erscht Mooß selwer mit sich oostösst), fällt ömmer widder auf, wie blöd sich die gscheite Oberbayern oostella, wenn sa a Bier trink wella. Wie der Hund zum Eerleecha! Blöd wie 10 Meter Feldwaach! Tausende Leut högga stundenlang durschtich in die Zelte, s Fernsehen unn jede Menge Brominenz iss dabei, wenn krampfhaft prowiert würrd, middn Hommer a Stögg Messing nei a Bierfoos zu klopfe, däss endlich woss rauskünnt. Bei uns in die Wirtschoft schließt der Wirt die Tür auf, nimmt a leersch Gloos, dreht oon Zapfhohn, unn innerhalb vo fönnef Minudde hömm die Leut zu trinke. Von weechn hübbermoderns München – Steinzeit nenn ich sowoss! Die Größenordnung vo doss Oggdoowerfest iss annererseits nadüürlich scho gigantisch. Bis zu 10.000 Lommba högga in ee Zelt dinn. Insgsamt gidds in die Zelte Platz für 70.000 Leut! Wenn doss bei uns middn Bevölkerungsschwund so weiter geht, basst in a poor Johr unner ganzer Landkreis – voss klee Kind bis zuss alt Frääla – do nei! Unn die Sauferei! Woss ich nie gegläbbt hädd, iss die Menge oo Bier, die jedesmoll in a Zelt gedrunke würrd, wenn die Musiggkabell „Ein Prosit“ spielt. Schätzt amoll! Ich hobbs middn Gotthold ausprowiert. Wenn du zu a Broosid aufgfordert würrscht unn vuursichtig oo dein Mooßgruuch ziehst, künnsda logger of 100 Milliliter = 0,1 Liter. Wenn vo die 7.000 Leut in ee Zelt nerr bloß 4.000 beis Broosid mitmache, senn nooch Adam Riese 4.000 x 0,1 Liter = 400 Liter gsoffa! 400 Liter innerhalb vo drei Sekunde. Doss iss a Umsatz vo 3.600 Euro! In drei Sekunde! Wie mir 2006 s 30-jäährich Bestehen vo unnern Hoosekühlesverein gfeiert hömm, worrn mer stolz drauf, däss merr in drei Dooch 12 Hektoliter, also 1.200 Liter ausgschenkt hömm. Doss saufe die beis Oktoberfest in ee Zelt innerhalb von drei Broosids! Irchendwie iss bei uns halt doch alles a boor Nummern glenner wie in München. Brossd, der Eustach. |
