| |
Bevuur ich Poker scho inn die Üüwerschrift so schreib, wie mirsch reeda, wollt ich Euch erscht die Mööchlichkeit gabb, zu wössa, üüwer woos ich schreib. Nuu wösst ersch. Es gätt also ömms Boogern. Dobei gädd mersch weenicher ömm doss berühmt-berüchdicht Korrda¬spiela oo sich, sondern mehr doodrömm, wieviel Geld geklaut wäär konn, wenn merr a Hotel üüwerfällt, in doss grod geboogert würrd. Falls s eener nedd gelasst hodd, well ich erscht erklär, woss neulich in a feins Hotel in Berlin bassiert iss. Do wor a Riesen-Boogerturnier oog’setzt und pro Mitschbieler musste sage und schreibe 10.300,-- € Einsatz bezoohlt wär. Und weil sich Booger-Spieler oo Geld nedd sood g’säh könna und bei’s Spiela wohrschein¬lich nur a hochs Risiko eigänn, wenn sa die villa Grööda wahrhaftig off n grössa Haufa senn, konnt doss Geld nedd vuurhar üüwerwiesa wäär, sondern musst bar bezohlt wär. A boor Gauner hömm doss Hotel während s Turnier üüwerfalla, unn üüwer 200.000,-- € geklaut. Und doss n hellalichta Samstichnochmiddoch! Nedd zu glääwa, owwer wallich so bassiert. Wie beruhigend bescheida iss doch im Vergleich dozu der Einsatz, wenn bei uns in a Wirrdschoffd vo a Durrf n Sonndichnochmiddoch Schoofkopf g’schbielt würrd. Mir hömm gezählt: n vergangene Sonndich hädda Gauner bei uns genau 8 Euro unn 24 Cent könn geglau. Scho a Unterschied zu 200.000,-- €, odder? Und do iss merr aach widder eig’falla, wie der Gotthold, der Erwin, der Gustav und ich 2002 bei die Einführung von Euro midd uns gekämpft hömm, wie merr uns mit unner Einsätz verhallde. Hädda mer 5 - 10 - 15 weiter g’schbield (für die Erklärung vo die Laie: 5 Pfennig hodds zu die seelicha DM-Zeida gaawa, wenn merr a eefochs Spiel gewonna hodd, 10 Pfennig bei n Beddl, unn 15 Pfennig bei a Solo), hädd sich der Einsatz durch n Euro glodd verdobbeld! 2 a halb, 5 und 7 a halb Cent is nedd ganga, also hömm mer uns of 2 - 4 - 6 geeenicht. Und doss gillt bis heut. Do sölla uns amoll a boor Gauner üüwerfall! Wenn die die rooda Gnöpf in die Korrdschirr¬felich (in so woss bewohrt jeder Korrder vuur siich offn Diisch sei Korrdgeld auf) sänn, ärchern sa sich freggt, drenn römm und haue widder ab. Oower ees hömm mir midd die Boogerspieler doch gemeinsam: g’schossa unn gedobbeld, also so richtig of Risiko g’setzt, würrd bei uns nur, wenn mer unner hocha Einsätz bar in die Korrdschirrfelich sänn. Servus, der Eustach. |
