| |
Wie ich neulich mit mein alte Fiesta widder amoll vo Mürscht aus üüwern Kreisel und die neu Stodthall durch Neuscht gfohrrn bin, woor ich bei’s Triamare unn die nächst Ampel, woos links nei die Stodt gedd, noch ganz entspannt. Schließlich hatt ich jo erscht siewe von bis jetzt 13 „Lichtsignalanlagen“, wie se jo ganz offiziell hässe, passiert. Owwer wie ich dann noch a Stögg weiter gfohrrn bin, und kurz vuur s neu Kaufland woor, hobb ich gstutzt und woor gleichzeitig erschrogge, weil genau beis Kino stand sie plötzlich, noch schöö säuberlich in Folie eigeweggelt, vuur mir: die neu Ampel mit die laufend Nr. 14 zwösche Opti unn Rederkreuz! Scho verröggd, odder? Irchendwie würrd merr s Gfühl nedd los, dässes in Neuscht a ungschriewens Gsetz gidd: wenn irchendwo in die Stodt a neue Ampel aufgstellt würdd, müsse gleichzeitig zwee neue Bäckereie aufmach. Stimmts nedd? Die neu Ampel woor noch nedd richtig gstanne, hodd in den neue Elektromarkt in die früher Disco geecheüwer vo die BayWa scho der nächst Bäck aufgemocht. Und bloß noch a boor Dooch dauerts, no würrd uns in Kaufland die nächst Backstube gredenzt. Ich hobb widder amoll s berühmt-berüchtigt World Wide Web bemüht. Deutschland hodd ungfähr 82 Millione Einwohner und s gidd derzeit angeblich 12.155 Bäckereie. Nooch Adam Riese künnt somit off 6.746 Leut ee Bäck. Zunn Vergleich dozu die Verhältnisse in Neuscht: 15.200 Einwohner und 21 Bäckerei odder besser gsocht, Loode, in denne Backwaren verkäfft werrn. Do muss merr scho genau unterscheid. Doss hässd: in Neuscht künnt off grod emoll 724 Leut a Bäck! Überversorgung hoch vier! Soo wenns nerr bei die Haus- odder Augenärzt wär!!! Metzger gidds übrigens, wenn ich richtig gezählt hobb, nerr bloß siewe. Dreimoll so viel Bäck also wie Flääsch- und Wurschtmechaniker. Intressant! Bei 21 Bäck in Neuscht nehme sich die jetzt ball 14 Ampeln bei eemol quer durch jo noch direkt bescheiden aus. Owwer ich merk scho widder, däss ich mich zum x-te moll üüwer die Ampel in Neuscht aufreech. Desweeche well ich midd a lustichs Gschichtle schließ, doss ich neulich in a Bäckerei (wo süsst?) in Neuscht erlebt hobb. Seecht a Moo zu die Verkäuferin: "Ich möcht 10 Wegg, owwer vo heut!“ Dodrauf die Verkäuferin: "Da müsse sie murrn widder komm, die vo heute senn nämlich vo nachte!“ Servus, der Eustach. |
