| |
Nochdem die Olymbische Spiele in Rio seit guud a Woche vorbei senn und ich mich vom ville Gugge erholt hobb, konn aach ich jetzt mei ganz persönliche Bilanz gezieh. Nedd alles wor Gold, woss geglänzt hodd, owwer es iss doch immer widder erstaunlich unn faszinierend, woss ennzelne Sportler leiste. Der klee Harting zum Beispiel. Noch vuur Olymbia hobb ich goor nedd gewössd, däss der Robert n glenne Bruder hodd. Und dann gewinnt der Gold! Gut, bei die Siegerehrung hodd er sich scho a weng komisch benomme, owwer soo schlimm woorsch nuu aa nedd. S muss ihm halt noch emoll erklärt weer, nedd däss er bei die Verleihung voss Bundesverdienstkreuz die Kanzlerin bei die Hymne zum Tanze auffordert! Odder unner Fabian Hambüchen! Woss die Turnerinne unn Turner leiste: verröggd! Mit Grausen denk ich oo mei Schulzeit unn den berühmt-berüchtige Felgaufschwung zurück. Und domit worscht du offs Reck jo erscht amoll nur droff! Dann die Dressurreiter. Der Kommentator voss Erscht, a gewisser Carsten Sostmeier, iss merr jo ball durchgedreht: „Isabell Werth! Ich werde heute Nacht nicht schlafen können. Und wenn ich einschlafe, dann träume ich noch jeden Moment dieser Dressur nach.“ Ich wäss jo nedd. Bei mir sidd do jeder Gaul und jeder Ritt gleich aus! Dann die absolute Superstars – natürlich nedd aus Deutschland. Usain Bolt, der schnellste Mann der Welt. 9,81 Sekunde üüwer 100 m, knapp 20 üüwer 200 m. Wenn der je 15 vo derre Läuf ins Johr mecht, schafft er grood emoll 8 Minudde im Johr. Verdient 46 Mio. Dollar und hodd somit n Stundelohn vo 345 Mio. Dollar! Nedd schlecht. Und der Michael Phelps, der menschähnlich Fisch vo Amerika düüwe. Mit sei 13x Einzel-Gold beim Schwömme iss er jetzt der erfolgreichst Olympionik seit 2.165 Johr. Hodd n selige Leonidas von Rhodos überholt, der zwösche 164 unn 152 v. Chr. nerr bloß 12x Gold gewonne hodd. Und do worrn die Kleebordfer scho oon Fernseh dabei. Schließlich hodd merr just in Kleeborderf a Gräberfeld aus genau derre Zeit gfonne! Sie könne desweeche nedd wie gebloont neue Häuser gebau. Rekorde üüwer Rekorde. Owwer halt nedd bloß bei Olymbia. 16 Leut vo die Firma Preh worrn in Indien bei die Hochzich vo n Arbeitskolleeche. 6.000 Gäst, 1.000 Verwandte! 1.000! Do wenn dei Kinner römm gehn unn „Prosst Neujohr“ wünsche, komme die mit 2.000,-- Euro hemm! Servus, der Eustach. |
