| |
Alleweil werrn bekanntlich Sportplatz-Roosemäher aus die Sportheime geklaut wie verröggd! Erschreggend! Der in Strohlunge iss furrt und der in Bastheim aach. Nedd lang her, woor scho emoll so e Welle und jetzt iss die selb Bande anscheinend widder doo bei uns. Owwer aach wo annersch werrn die Hightech-Geräte gemobbst, däss nedd feierlich iss und die Vuurständ stenn ratlos vuur die aufgebrochene Halle. „N Aufsitzmäher hömm se mitgenomme, owwer unner noochlneus Linienzeichengerät hömmse steh gelässe.“ Wunnert mich jetzt nedd, weil däss merr n schönne Roosemäher gut gebrauch konn, leucht mir ei. Woss merr als Gauner owwer mit so a Linienzeichengerät (früher „Obbsträäwäägele“) oofang söll, wösst ich jetzt nedd. Egal. Früher worrn die Dürrfer aus n ganz betimmte Grund eefoch besser gschützt. Die Sportplätz und die Sportheime worrn noch medde ins odder nooh oos Durrf (Gartenstadt, Trappschd, Grösseborrderf) und ins Durf hodd a ganze Armada oo Überwachunginstitutione für Ruh gsuchrt. Woss ganz früher der Nochtwächter wor, iss später durch die Zeitungsfraa, s Mellichauto und die Spätheimkehrer aus die Wirrdschoffde obbgelöst wurrn. Und heut? Die Zeitungsausträger komme oft ömmer später, s Mellichauto föhrt nur noch die größe Mellichbauer oo, künnt also nixmer nei die Dürrfer (Mellichsammelstell ade!) und Spätheimkehrer gidds nixmerr, weils kee Wirrdschoffde merr gidd. Ein Teufelkreis! Woss woor doss früher ömmer a Jochd, bis dir a Grund eigfalle iss, worömms in die Wirtschoffd widder fast vier Uhr wurrn iss! Der Gotthold hodd sich do eines Tages als Ausred woss eilässfall, woss bis heut seinesgleichen sücht. Er sollt vo sei Fraa aus Schnegge käff (sie wollte sich halt aach amoll wos Feins gönn), iss hemmwärts in die Wirtschoffd eigekehrt und bös versumpft. Hallwer vier woorsch, wie er sich mitsamt sei Schnegge offn Hemmwaach gemocht hodd! Vuur sei Haus ookomme, hodd er die Schnegge vuur die Haustür schöö in Zweierreihe aufgstellt, die Haustür aufgsperrt und a weng Krach gemocht. Scho iss ins Schloofzimmer s Licht oogange und sei Hedwig hodd ausses Fenster rausgeluurt. Und der Gotthold? Hodd a glee Steggele genomme und zu die glenne Tierlich vuur sich gsocht: „Soo, ihr Schnegglich, auf geht’s! Zwee Meter noch, no hömmersch und senn endlich dehemm!“ Servus, der Eustach. |
