| |
Die Ältere werrn sich sicher noch droo derinner könne: süsst hömm Jeans eefoch „Cowboyhose“ ghässe. Und es iss fein säuberlich zwösche soo a Cowboyhose und zum Beispiel a Manchesterhose unterschiede wurrn. Die Cowboyhose woor a bloowe Jeans, wie merr se heut noch hodd und die Manchesterhose woor a Cordhose. Ja, die Mode. Woss bei die junge Leut vo heut jo ganz modern iss, senn Cowboyhose, die scho kaputt senn, wenn merr sche neu käfft! Hobbt ihr sicher scho gsenn. Die junge Laut laffe römm, wie aus n Wooche raus! Die Hose, vor allem oo die Knie, owwer aach oo annere Stelle aufgeresse, ausgfranst und mit Löcher, däss du denkst, derjeenich gädd jetzt als Voogelscheuche off a frisch gsääts Feld, ömm sich so a boor Krööte zu verdiene. Mein lieber Herr Gesangsverein! Früher hodd merr ömmer gsocht, däss a Fiat scho innen Katalog rost. Doss ging jo noch. Owwer stell dir amoll vüür, du käffst dir a neus Auto, bestellsts owwer scho mit verboochene Kotflügel und neigschloochene Fenster, weil doss halt grod modern iss! Woss mit die Hose gädd, muss mit die Auto doch aach möglich sei! Und merr konn sich jo noch ganz annere Dinger vuurgstell. Öpfel werrn nerr bloß noch gekäfft, wenn se scho oogebisse senn. Schmarrphones komme neu scho mit zersplitterte Scheibe (iss cool!!!), Möbel stenn scho verkratzt und mit oogebrochene Ecke und Kante in die Möbelhäuser, weil se süsst keener merr käfft. Muss jo sauschwer sei, doss ganz Zeuch, wohrscheinlich mit a ganz ausgeklüüchelts Qualitätssicherungssystem, erscht in Dobb-Qualität herzustelle und dann in a Abteilung zu geewe, wo alles widder kaputt gemocht würrd! A Kontrollzettel dinn: „Diese Hose hat für Sie kaputt gemacht: Rosi.“ Ich sooch jo, die Welt iss verröggd! Und jetzt stell dir doch amoll eene vo unner bewunnerswerte, geliebte Omalich vüür, die noch dehemm bei die Junge wohnt und früh rein zufällig die Jeans voss Enkele sidd, doss die noochelneu Hose nooch die Disco eefoch mette dürrt lieche gelässe hodd. Die Oma hebt se auf, sidd die Löcher in die Knie und fängt s stopfe oo. Denkt, s Glee iss hiegfalle und hodd sich die Knie aufgschlooche. Bis die Jennifer ihr Räuschle ausgeschloffe hodd und aufweggt, iss die Hose vo die Oma repariert und die Löcher senn zu. Und die Jennifer, aufgebrocht beis Middochesse: „Wer hodd mei Hose freggt gemocht??!!“ Ja, ja. Die Jugend vo heut. Servus, der Eustach. |
