| |
Der Wohnmobilstellblatz in Könnshoofa iss jo mittlerweil in ganz Deutschland bekannt und doo drauf könna sich die Könnshööfer wallich wos eigebild, weil sa doo echt wos loos hömm. Der Gotthold und ich, mir staune ömmer widder nedd schlacht, wenn mer amoll zufällig oo dann Platz naawa s Kurzentrum mit die Frangendärrme (furchtboor, wie sich dos schreibt und doss hodd fei wallich nix mit a Metzgerei zu dunn!) vorbei fohrrn und die villa Wohnmobile do sänn. Und neulich hob ich in die Zeitung gelasst, däss üüwer die Weihnochta mehr wie 200 Wohnmobbilissde doo senn und Weihnochte feiern und doss s Bayerisch' Fernsehn sogoor n Film wert woor. Weihnochte allee mit die Fraa bei die Säukält’ zomm in a relativ engs Auto feier - do g'höört scho woss dazu, odder?! Owwer Wohnmobbilissde senn nuu amol a Volk für siich, wie jeder vo uns wääs. Ich frääch mich ömmer, wie dos obbläfft, wenn so a Hardcore-Wohnmobbilissd hunnerde vo Kilometer und stundenlang mit sei Fraa alee drhie fööhrt und n neue Stellplatz sücht. Forschunge hömm jetzt angeblich ergaawe, däss a durchschnittlichs Wohnmobbilissde-Eheboor of 300 km genau 3 Sätz mitanner redd. Und die komma alle drei von Mooh. Bis zum erschta Satz dauert's logischerweis zirrga 100 km und der Satz iss kurz unn bräggnannd und laut "Der spinnt doch!" Dann Satz seecht der Mooh, wenn er of die Autoboh mit 70 of die racht Spur dre hie zuggelt und vo a Auto mit 200 Sachen üüwerhoold würd. Der zwedd Satz künnt no a guuda Stonn später unn hässt: "Läss mich amoll trink!" Widder vo ihn, weil er jo fööhrt und sie die Wasserflöscha ständig griffbereit hobb muss. Und der dritt Satz schließlich fällt so noch 300 km und gut vier Stonn, wenn er so langsam müüd würrd und fräächt: "Welle mer amoll halt?" So fräächt er natürlich nur, wenn er vo unner Geeched künnt. Annersch hässts: "Wollen wir einmal anhalten?" "Ich glääb, ich käff mer ach a Wohnmobil!" hodd der Gotthold zu mei Üüwerraschung g'socht, wie er doss g'höört hodd. "Wie künnsda denn doo drauf?" hob ich g'fräächd. "Noo Eustach, üüwerleech doch amoll. Bloß 3 Sätz in üüwer 4 Stonn und keener dovo vo die Fraa. Doss iss jo wie in's Paradies!" Womit d’r Gotthold n Noochel widder amoll voll off'n Koopf gedroffa hodd! Servus, der Eustach. |
