| |
Üüwer die berühmt-berüchtigt Abwraggbräämie is scho soviel g’schriewa und geredd wurrn, däss mer jo ächentlich kee Wurrd mer drüü verlier sölled. Sogoor der Gotthold hodd sich dazu hie läss reiß, sei’n alte, fuchza Johr alda Fiesta vereggt läss zu mache und sich do defür n neue VW Bolo zuzuleecha. Seit n zwetta September iss der Doopf vo die Abwraggbräämie jetzt ratzibutz leer und wer bis jetzt nedd droo wor, der guckt nei die Röhra – und spoort domit vill Geld! Der Staat hodd bei derra Bräämie widder amol – so deutlich wie nie zuvuur – gemerkt hot, wie er sei Bürcher aus die Reserve gelock konn. 2.500 Euro für a alt’s Auto oogebooda, alles subber gut erklärt und stolz verkünd, wie gnädig der Staat is, ömm der notleidend Autoindustrie zu höllfa – und die Leut senn massenweis of doss G’schäft eigange. Und wos hodd’s net alles für hoorsträuwende Fäll gaawa. Leut, die mit Auto of’n Schroddblatz g’forrn senn, für die sa wo annersch noch locker 3.000 – 4.000 Euro g’richt hädda, doss owwer nedd gemocht hömm, nur ömm oo die 2.500 Krööda von Staat zu komma. Und wos hodd der Staat für Groggodielsdrääna g’flennt, wie er doorgeleecht hot, däss doss alles fünf Milliarden Euro kosst. Und wie ich neulich n Gotthold sei Rechnung für sein neue Bolo un die dodroff fein säuwerlich ausgewiesane Mehrwertsteuer betrocht hob, is mersch wie Schubba vo die Aacha gfalla. Der Bolo hot insg’samt, also mit die Steuer, 15.658 Euro gekosst, s rein Auto ohne die Steuer wor mit 13.158 Euro in die Rechnung g’stanna. Und wie ich no g’senn hobb, däss hinner „Mwst.“ genau 2.500 Euro g’stanna woor, is mir schnell kloor wurrn, wos ich scho vermuut hob. Selbst bei die billige Auto hodd der Staat als Steuer genau doss widder eigenomma, wos er als so großzügig doorg’stellts Almosen ausgaawe hot. Bei jedes Auto, wo teurer woor wie 13.158 Euro, wor die Steuer höcher wie die Abwraggbrämie und der Staat hot noch a murrd’s G’schäft gemocht. Stell dir amol vuur, du gehst zu dein Beck, und er seecht dir, däss du für jede Stolle Brood, wo da käffst, jetzt 50 Cent g’schenkt grichst, die Stolle jetzt ower 50 Cent mehr kosst. Kloor, so richtich vergleich konn mer doss nedd mitananner, owwer irchendwie doch. Jeder dääds kapier. Und dobei gäängeds ömm lommberda 50 Cent. Owwer bei 2.500 Euro, schöö in a Rechnung als Steuer versteggelt, do schnallt’s keener. Servus, der Eustach. |
