| |
"Wer jetzt scho ferrdich iss, hat nix daus g’hood!“ Doss woor n Gotthold sei Antwurrt of mei Frooch, worömm eer jetzt ömmer noch net mit’s Dröscha ferdich is. Er wollt bloß widder net zuugab, däss er mit sein alte Ferguson und 1,20 m Schnittbreite fast n ganze Dooch oo ee Hektar römmbelzt. „Owwer wie ömmer iss aach heuer bei’s Dröscha der Hass widder in mir hoch komma!", hot er ganz aufgereecht g'socht. "Der Hass? Of woos!?“ "Der Hass of'n Jürgen Drews, den natürlicha Feind vo alle Mähdröscherfohrer!" Jetzt wor mir kloor, of wos der Gotthold obg'hoowa hot. Jürgen Drews, der Sänger vo dos Lied "Ein Bett im Kornfeld". Wos hott der Fregger mit sei blöd's Lied domols owwer aach für'n Ärcher ausgelööst! Laufend hömm uns die Leut of sein Vuurschlooch hie s Gedrääd zommgedrückt und uns so a boor schönna Zenner pro Ernt' kabudd gemochd. Dabei hatt der Blöödel kee Ohnung vo Aggerbau un Viehzucht! Wie hott's in sei Lied g'hässa? "Ein Bett im Kornfeld" usw., "die Grillen singen und es durftet nach Heu." Nooch Hää?? Wie söll's denn in a Gedräädfeld nooch Hää riech?! Und weiter hot er g'sunge: "Ein Bett im Kornfeld, zwischen Blumen und Stroh" Blomma?? Freilich, wenn ich mich in n Gedräädagger vo n Biobauer nei leech, wo net sprötz döff, no muss ich mich net wunner, wenn Baawinda und so Zeuch wöchst. Furchtbor! Ower die Schlagerfuzzis vo sellamol hatt ich sowieso g'fressa! Zum Beispiel der Hauward Karbendäil mit sei "Äliss"! Zu blöd, dess er'scha amol gscheit oog'schmarrt hätt, wenn er scho woss vo ihr gewöllt hott, die daab Sau! Of die anner Seite hott a annerer bekannter Schlagersänger n Karbendäil sei Schüchternheit sein Nooma zu verdanke. Jetzt müsst ihr rood. Wos für a Nooma is entstanne, wie der Schoofkopf-Fan Hauward Karbendäil in sei Verzweiflung sein Zimmernochber, der wohrscheinlich a Moo wor un "Alois" statt "Äliss" g'hessa hot, g'fräächt hot: "Kossda korrd, Alois?" Wersch wääs, schreibt die Lösung in a Ihh-Mäil oo Info@GottholdundEustach.de odder off a Postkorrda (Main-Post-Redaktion, Hohnstraße 16, 97616 Bad Neustadt) und gewinnt bei a Verloosung vielleicht a Eintrittskorrda für n lusticha Frühschoppa mit mir n 27. September, a Weizen und n Saalz-Braazel. Ohne Scheiß! Servus, der Eustach. |
