| |
So, kaum iss 2014 losgange, bin ich aach scho widder doo. Ich wünsch euch a gsunds neues Joohr und hoff, däss ihr guud oogfange hobbt. Ja, so iss halt alles widder in sein alte Trott, noochdem die Eikäfferei, Feierei, Esserei, Sauferei unn die Neujohrschwünscherei endlich widder römm senn. Owwer so wells der Mensch jo ächentlich aach. Alles söll so sei, wie ömmer und wenn eener woss vuurmecht, no maches die annere nooch. Der Mensch iss a Herdentier, do gidds für mich keen Zweifel. Und doss is jo aach wissenschaftlich beleecht. Fönnef Prozent lange aus, ömm die annere 95 dazu zu bringe, doo hie zu laffe, wo sie hie gänn. Doss iss bei die Hammel, die Vööchl unn die Fisch so und bei uns Mensche nedd annersch. Doozu brauchts goor kee Wissenschaftler, doss konnst du alles sellwer am lebenden Objekt noochgeweis. Nemm doch nur amoll die Müllabfuhr als Beispiel und mach n Selbstversuch. Lässes dunkel und jetzt n Januar oowerts soo sechs Uhr wäär unn stell dei Mülldonne raus, obwohl du genau wässt, däss die Abfuhr erscht üüwertsmurrn iss, unn die Donne erscht n nächste Oowerts raus müsse. S dauert kee viertel Stonn, do gugge die erschte scho unsicher unn nervös hinner die Vuurhäng vüür und üüwerleeche, ob sie ihr Donne vergesse hömm. Und wenn sich weeche dir, der duus jo obsichtlich falsch gemocht hosst, vier annere dazu entscheide, ihr Donne aach nauszustelle, stänn zwee Stonn später in die Hauptströss 95 annere Mülldonne hause und es könnt tatsächlich geleert wäär. Hunnerprozentich! Odder stell dich noo a Fußgängerampel, die "Rot" zeigt, ruff nooch a halwe Minudde "Grün" und mach n Schriid off die Ströss. Garantiert lefft die ganz Meute los. Iss allerdings nedd ganz ungfährlich. Und betrocht die ganze grösse Events im Jahresablauf: Hollschter Bierfrühling, Morrdblatzsommer in Neuscht, Rakoczy-Fest in Kissinge, Oktoberfest in Weisbich odder in München. Mit a boor weeniche Leut gädds los und mit Tausende hörts auf. Odder Halloween, doss Fratzefest. Früher hodds doss bei uns nedd gaawe, a boor fange mit oo, alle maches nooch. Ja, der Mensch iss a Herden- unn Gewohnheitstier. So wie die orrm Fraa leidvoll erfohrrn hodd, die bei ihrn Moo gegloochd hodd. "Seit 33 Johr korrigierts du mich, egal woss ich mach odder sooch. Schlimm!" Dodrauf er, der holde Ehemann: "Seit 34 Johr, mei liebe Fraa, seit 34!" Servus, der Eustach. |
