| |
Und, hobbt ihr die Dorothee Bär die vergange Woche bein Pelzig ins Fernsehn gsänn? Gut, nä? Und wie se widder ausgsänn hodd! So goornedd a weng wie a Boliddigerin. Natürlich schöö unn logger. Wie se doss alles mit ihr drei glenne Kinner nerr bloß schafft? Sowieso erstaunlich, woss verschiedene Leut im Vergleich alles schaffe unn anscheinend trotzdem ausgegliche unn ohne Stress bleiwe. Off die ee Seite jemand wie die Dorothee Bär, unner Landrood odder a Spitzenmanager. Ständig unter Strom, vo een Termin zum annere ghetzt, s Wochenend off die Festlich römmgebollert und wenn der Moo odder die Fraaa oowets fräächt: "Unn, wie woors heut?" die Antwort: "Spannend!" Kee Spur vo Druck odder Üüwerlastung. Unn dos johrelang. Unn off die anner Seite? Nehm zum Beispiel n Techniker vom Bayerische Rundfunk, der im Sender Kreuzberg schafft. Ich hobb neulich een getroffe unn gfräächt, woss er doochsüwer off die Ärwed so mecht. Unn die Antwort: "Mir gugge zu, wie merr sende." "Spannend!", sooch ich. "Passiert doo aach amoll woss?". "Ja, ja! So alle zwee, drei Dooch fliechd amoll a Schalter naus." "Ja, unn woos macht ihr no?" "No mache merrn widder nei." Ich sooch jo: spannend! Und garantiert seecht er, wenn er oowets hemm künnt und die Fraa fräächt, wie's heut off die Ärwed woor: "Hör merr auf! Die mache uns noch kaputt!" Sein und Schein. Nedd annerscht n Samsdichvurmiddoch in unner Städt unn Dürrflich. Off die ee Seite zum Beispiel München, Fußgängerzone. Dürrt setz, Cappuccino, a Zigarette, a Zeitung, schö Wadder. Völlig normal. Kee Sau stört sich droo. Off die anner Seite, widder nur als Beispiel, Rödles, Durfplatz. N Samsdichfrüh mit n Cappuccino, a Zigarette und a Zeitung in die Sonn setz? Völlig ausgchlosse! "Jetzt gugg dir den Faulenzer oo! Hodd der nix zu dunn?" So odder so ähnlich dääds häss. Du konnst doss alles gemach. Owwer nedd offn Durfplatz. Wenn üüwerhaupt, dann dehemm, in dei Wohnzimmer odder besser noch onnde in dein Kaaler und die Tür zugschlosse. S könnt jo ees gekomm. Und die sicherst Methode für n Moo in unner Geechend n Samsdichvurmiddoch Eindruck zu schinde? Gleich früh die Latzhoose oogezooche, s obligatorisch Hängerle noos Auto ghängt und dreimoll durchs Durf gforrn. Idealerweis midd a boor Braader odder a boor Äst droff. Irchendwoss halt, woss oowe rausguggt. Servus, der Eustach. |
