| |
Heut konn ich a weng frecher g’sei wie normal. In Frangreich is nämlich National-Feierdooch und daswaache gitt’s dürrt heut kee Main-Post. Also konn ich üüwer die Franzose hergeziech. Ich hob mich nämlich schwer üüwer die geärchert! Net nur däss jetzt widder Duur de Franz is und alle Roodfohrer vo die ganz Welt waache den Maulaff drei Woche durch die Geechend forrn und sich vuurhar mit Sprötzlich und Tableddlich aller Oort vool gebommd hömm. Geärcherd hob ich mich, weil dos dürrt scheinbor net bloß die Roodfohrer mit sich selwer mache, sondern aach derjenig Franz mit sei Hünner. Jawohl! In Frangreich werr’n aach die Hünner gedobbt! Rausgricht hob ich dos neulich, wie ich mit’n Gotthold un unner bessta Leech-Hünner bei die unterfrängisch G’flüüchelzuchtschau in Würzburg gewonna hatt und mir zu die europäisch Endausscheidung nooch Paris eigelooda worrn. Eine Aufreechung soch ich euch! Der Gotthold und ich nooch Frankfurt of’n Fluuchhafen und mit die Lufthansa noch Paris gedüüst. Wie mer düüwa mit unner zwee Spitzenhünner, wo die grössta Eeer leecha, aus s Fluuchzeuch ausg’tiega senn, die Hünner in a Babbadeggelschochtel mit Löcher dinn, dochte mer, uns trefft der Schlooch. Stett doch do ein Riesenkoloss vuur uns of’n Pariser Flughafen „Karl, der Gaul“ und droff städd – genauso riesig – „Air France“. Und vurrn bei die Tür – a weng klenner, ower noch gut zu laase – „Airbus“. „Dos is jo der Hammer!“, seecht der Gotthold ganz berblex. „Der Hammer?“, sooch ich, „Dos is net der Hammer! Dos hässt, däss mir mit unner Rhöner Hünner nett den Hauch einer Chance hömm! Dos is der Eier-Bus vo’n Eier-Franz! Do hot der wohrscheinlich Hunnerde vo Hochleistungshünner dinn, n ganze Bus voll, und alle vool gebommd mit Dobbing bis owa hie. Wos gläbbst denn du, woss die für Drömmer Eeer leecha! Do konn der Franz bequem 20 statt 13 Cent für’s Eeer verlang!“ Ower net nur der Franz, die Spitzenzüchter vo die ganz Welt worrn do: Air Canada, Air Berlin, Air India. Alle do. Mir zwee römmgedreht, zurück nei unnern Fliecher und widder hemm. Ich läss doch mei Hünner wache 7 Cent mehr pro Eeer net n Oorsch ausfranz! Womit mer scho widder beim Franz oogelangt werrn. Ganz noch'm Motto: "Keine Schanz geech'n Franz!" Do könne mer nur verlier. Genau wie die Anni Glückstein geecha die Claudia Pechstein. Keine Schanz. Alles Dobbing. Servus, der Eustach. |
