| |
Die vergange Woche woorsch bei uns in die Geechend widder soweit unn der Bischof woor zur Firmung doo. Ich woor jo scho lang nixmer bei so a Firmung dabei unn soo hobb ich mich orch drüü g’frääd, däss ich bei’n Buu vo mei Nichte der Firmdood (Baad) döff sei hobb. Doo künnsta bis vurrn noo unn konnst dabei zugegugg, wie sich doss Handwerk heutzudooch obbspielt. Früher zu unner Zeit woorsch jo noch soo gewasst, däss dir die alte Blöödel vuur die Firmung Angst gemocht hömm, indem sa g’socht hömm, däss da bei die Firmung a Schöll von Bischof grichst. Woor jo süsst a tatsächlich so. Der Bischof hodd bei die Firmung a klenna Baggeschöll oogedeut – der ee mehr, der anner weenicher – und doss sollt der Bedeutung noch so a Oord Ritterschlooch sei, den du als Firmling von Bischof gricht hosst. Woor jo a nix dabei. Wenn früher a Haawerei woor odder eener eefoch soo amoll eena g’fange hodd, hodd mer jo aach scherzhaft g’socht: „Deer iss g’firmt wurrn!“ Und so wor ich als Firmdood also g’spannt, in vürrderschter Reih mitzuerlaawa, wie dos heut obleffd. Und ich muss sooch, däss ich scho a weng enttäuscht woor. Der Bischof hodd nedd amoll oodeutungsweis hieg’haawe, obwohls mei Deifele vo Döödla fei wallich nedd g’schood hädd.
Die oogedeut Schöll wär für soon Bischof in die heutig Zeit owwer aach wallich a Problem. Haabt er bei een vo die Vööchel a weng zu orch hie, konnst da d’r doch ausgemool, wos n annere Dooch in die Zeitung stäh dääd. Noch a treffends Bild dazu unn der nächst Skandal wär berfeggt. Der Gotthold hodd mich dann owwer belehrt und mir erklärt, däss die Firmung scho vuur üüwer 30 Joohr reformiert wurrn iss und seitdem die oogedeut Baggaschöll nixmer existiert. Irchendwie schood, weil domit senn die Firmling zu unner Zeit noch offs richtich Laawa vuurbereit wurrn, woos jo bekanntlich nedd grood zimperlich zugädd. Ower gut, iss halt aach widder awoss nixmer soo wie’s süsst amoll woor. Und wie doss süsst woor, iss merr erscht neulich widder bewusst wurrn, wie ich in die Zeitung die Todesanzeiche vo n alte Pforr (es hädd aach a alter Lehrer odder a altdeutscher Vodder könn g’sei) gelasst hobb, der in irchend a Durrf g’sturrwa iss: „Ein gutes Herz und zwei kräftige Hände haben aufgehört zu schlagen“. Servus, der Eustach.
|
